虎豹別墅的故事

除了景賢里、何東花園之外，香港有名嘅古老大宅，一定要提到屬於一級歷史建築的大坑虎豹別墅。虎豹別墅及其鄰近嘅萬金油花園, 係由已故「萬金油大王」胡文虎喺香港興建嘅一座別墅花園，位處香港島大坑嘅大坑道，鄰近勵德邨，而家被列為一級歷史建築。

香港人對虎豹別墅印象，唔少人會聯想到「勾脷筋、炸油鑊」等十八層地獄浮雕。遺憾的是，當年開放予公眾的萬金油花園和虎塔，以及其中的十八層地獄浮雕都未能保存下來，只剩低作為私人住宅的虎豹別墅。

香港虎豹別墅除了象徵商人家族的財富和權力，亦體現昔日殖民地時代的香港，尚能保留中國文化的特色。

其實在上世紀全球有3座虎豹別墅，分別位於香港、新加坡和中國福建省。值得一提的是，新加坡除了得以保存萬金油花園，更將胡家舊車庫改建為地獄博物館，展示最受遊客喜愛的「十殿閻羅」，並講述不同文化如何看待死亡和來世，讓來自各地的年輕遊客都能產生共鳴和興趣。

至於大坑道嘅香港虎豹別墅，其紅牆綠瓦嘅設計好易認，係胡文虎於 1935 年耗資 1600 萬港元興建嘅私人別墅，當年作為胡家喺香港嘅住所。

整個虎豹別墅建築群佔地 53 萬平方米，集合咗中西建築特色，旁邊嘅萬金油花園更加對公眾開放，同市民共享，7層高嘅白色六角「虎塔」高44米，曾經係香港島上唯一嘅中式塔樓。而「十八層地獄」則係牆上嘅浮雕，刻有漢字文化圈裏結合佛教、道教同民間信仰嘅陰曹地府故事，包括落油鑊、勾脷筋等場景，帶出警惡勸善嘅故事，昔日唔少家長因其「教育意味」，特登帶同小朋友前往參觀。

至於虎豹別墅共4層高，連同花園共佔地約 2000平方米，大宅正門係月洞門，地下有客廳、飯廳、閱讀室、遊戲室同音樂室。客廳嘅設計有濃厚嘅中國風，用到飛簷作壁飾，掛有姜太公釣魚同八仙過海嘅圖畫；飯廳則以天花上嘅金箔十字裝飾最吸引人，飯廳同位於地庫嘅廚房之間有一個隱藏嘅傳菜秘道，係當年嚟講都算先進設計。頂層閣樓有一個玻璃天台屋，原本有祭神嘅擺設，相信係用作宗教用途。

香港回歸之後，時至金融風暴期間，虎豹別墅在胡文虎後人、前星島集團主席胡仙繼承之後，因面臨經濟困難，而將家族大宅連同萬金油花園以一億元「賤價」出售予李嘉誠的長實集團，最後發展成今天嘅豪宅渣甸山名門。

香港政府當年同長實達成地積比率轉移嘅計劃，換取保留虎豹別墅及其私家花園，物業亦喺 2001 年交還香港政府，其後空置咗近十二年。

最後，胡仙嘅「胡文虎音樂基金」喺2013年投得活化發展嘅權利，改名做「虎豹樂圃」，然後喺2019年正式對公眾開放，變身成為一個音樂同文化藝術嘅場所，別墅都有一個新嘅名字：虎豹樂圃（Haw Par Music Farm）。

但去到 2022年9月9日，政府宣布虎豹樂圃於同年12月1日起停止營運，「虎豹別墅」亦會在同日交還政府，發展局會定期安排以導賞團等形式讓市民參觀建築。

因為虎豹樂圃向政府表示，項目無法再持續營運下，提早中止原定於2025年3月31日屆滿的租約。自2023年6月9日起，虎豹別墅重新免費開放，市民可透過古蹟辦的網頁預約導賞團。

香港的虎豹別墅以及萬金油花園，那種獨特的私人別墅混合主題公園形式，除了代表1930年代財富和權力集於一身的商家府第，亦象徵殖民地時代的昔日香港，能夠保留有中國文化的特色，曾經係香港作為「東方之珠」時代獨有嘅風景。

然而，相比之下新加坡選擇保留的是開放予公眾、承載了更多集體回憶的中國民間故事主題（別墅反而拆除了），兩個虎豹別墅截然不同的下場，何嘗又不是在反映香港和新加坡作為國際都會，兩者之間在不同層次的差異呢？