周慧敏的情商智慧

周慧敏作為 80 年代的紅極一時的女星，藝術成就極高，作品不計其數，佢本身亦係香港流行文化集體回憶之一，素有「玉女掌門人」美譽。

雖然演藝事業光芒四射，周慧敏本人卻有一股與世無爭的「仙氣」，面對公眾壓力乃至一些無理批評，佢能夠保持冷靜忠於自己，作出一些普通人意想不到的抉擇：包括年紀輕輕（當時年僅30歲）退休移民加拿大温哥華，以及後來在驚濤駭浪、輿論尖銳的亂局之下，與相戀多年的倪震步入婚姻。

周慧敏係家中獨生女，亦係遺腹女。佢爸爸喺佢未出世之前，就因為心臟病離世。由細到大，由於媽媽要外出工作揾錢，佢好多時間都係由婆婆照顧，導致母女關係有少少疏離。後來接受訪問曾經提及，媽媽因為艱苦生活而變得倔強嘅性格，亦影響咗佢哋嘅關係，直到佢投身社會工作之後，媽媽嘅負擔減輕左，佢哋嘅關係先慢慢再拉近。

周慧敏喺港島西環高街度長大，就讀聖士提反堂小學（小一至小三）同救恩書院（小四至小六），然後就升讀聖士提反堂中學。中五畢業之後，曾經因為疲勞過度患上肺結核，歷時半年先至康復。青少年時期嘅周慧敏，好早已經信咗基督教，佢後來一直都有分享信仰嘅見證，包括推出福音大碟。

1985年，18歲嘅周慧敏參加咗第四屆新秀歌唱大賽，佢以日文版嘅《最愛》參賽（之後亦改編成廣東話版本），而當屆冠軍係杜德偉。至於佢，當時亦因為表現優秀，獲得時任德寶電影公司高層嘅俞琤賞識，獲邀參與電影演出。

與此同時，俞琤又推薦佢去寶麗金唱片同百代唱片試音，雖然兩間公司都有興趣同佢簽約，但周慧敏因為媽媽嘅反對，最後都繼續升學，完成埋預科課程。同一時間，TVB 亦有邀請佢擔任許冠傑《日本娃娃》MTV 女主角，同樣因為周媽媽反對而未有出演。

1986年，喺電台監制鄧藹霖同倪秉郎鼓勵下，周慧敏參加咗香港電台主辦嘅業餘唱片騎師大賽，並且獲得亞軍。之後佢接受培訓，喺1987年6月開始以兼職身份，正式加入香港電台唱片騎師行列，於課餘時間展開演藝事業。當年同期受訓嘅同學包括梁兆輝、陳漢詩、李克勤同阮兆祥等人。

然後，周慧敏喺電視台擔任《勁歌金曲》主持，逐漸再轉型成為歌手，實行「歌影視」三棲發展。周慧敏出道嘅時候，以清純形象為主，迷到萬千少男少女。

去到1994年，佢推出歌曲《感情的分禮》，拍MV時候穿著著名形象設計師余家安設計嘅18世紀宮廷裝，由於豐滿上圍引人注目，大家對佢嘅震撼造型大為驚艷，算係佢入行以來最性感嘅形象之一。

雖然事業發展十分順利，但周慧敏在1997年毅然選擇退休、隨男友倪震移民加拿大溫哥華居住，只偶爾參與出席一些公眾場合。旅居加拿大後，周慧敏後醉心於繪畫、寫作和美式撞球。其中畫作《新疆老翁》、《望過去看將來》等作品甚至獲得過獎項。

「97年有次拍電影，眼睛忽然唔舒服，獨自坐的士去醫院檢查，當時係下班時間好塞車，我又緊張，眼淚唔斷流出嚟。嗰陣噉啱 Joe 想搬去溫哥華生活，我嘅合約又差唔多完結，所以就選擇同佢過去嗰邊生活。」

周慧敏受訪時憶述，當時喺香港壓力好大，感到難免受人意見影響，令自己迷失方向：「迷失唔係一件可怕嘅事，最可怕嘅係唔知道自己迷失。」佢當時表示，自己最想擁有嘅係『有靈性嘅生活』，例如去以色列聖地旅行。」

適逢歌、影、視同經紀合約已相繼到期，周慧敏覺得係時候停下嚟，重新調整生活、計劃將來，決定離開香港放長假，重新做一個普通人，重新出發去認識自己。

後來過了好幾年，2003年香港受到沙士疫情嘅衝擊，周慧敏一時之唔能夠返回加拿大，所以同倪震商量之後，當下就決定回流香港生活。

意料不到嘅係，時間快轉 5 年之後，倪震在 2008年被傳媒拍到跟大學生張茆於酒吧熱吻，事件令倪震宣佈與周慧敏分手，但誰不知分手接近一星期，二人就戲劇性地復合並且宣布結婚。就當年傳媒氣候而言，相關報導固然令事情火上加油、愈演愈烈。

在婚訊公佈之後，幾乎整個香港都參與「討論」，全部輿論矛頭直指倪震，認為一切都係佢精心策劃嘅好戲，即使是一些演藝圈同路人，亦難免紛紛發聲：

「佢哋結婚？咁都得？我真係唔識欣賞倪震呢個人，女人搵男友嘅條件係有責任心，有人揀靚仔、有錢、內涵，不過佢好似全部都冇，周慧敏嘅包容世間少有，可以做恐龍，絕晒種。」

「我打咗畀倪震恭喜佢，周慧敏將來條路一啲都唔難行，因為有你哋睇住，男方仲點敢亂郁，不過換着我唔會等20年，女方中咗降頭咁，所以大家要欣賞佢癡情，呢個世間好難搵。」 

甚至過咗好多年，到2012年黃凱芹嘅演唱會，周慧敏同佢上台合唱嘅時候，依然有觀眾大叫：「飛甩個賤男啦！」

對於所有的質疑和攻擊，周慧敏一直都不予反應。直到兩個人步入婚姻十年，周慧敏2018年在社交媒體貼咗當年簽字結婚相，加埋自己歌曲《肋骨》入面嘅四句歌詞：「存在就好似一個身體，苦同樂都係一樣，大家無論異同，都要尊重愛。」佢以實際行動證明，佢當初聆聽自己內心而作出嘅決定係正確。

我們經常會聽到一句說話：「要做自己」。 問題是很多人都還不清楚，到底想要成為什麼樣的自己？正如周慧敏自己所講：「迷失唔係一樣可怕嘅事情，最可怕係唔知自己迷失。」

探索自己、了解自己是每個人一輩子的功課，好似「不要用社會的框架來定義自己」 、「不用照單全收他人的評價」呢啲說話，聽起上嚟好似十分容易，但其實付諸實行嘅時候非常困難。

周慧敏嘅情商故事至少教會我哋一樣嘢：我哋嘅生命得一次，時間好有限。如果只係為咗滿足人哋嘅期望而壓抑自己、放棄真正嘅自我，就實在太唔值得喇。