李君夏的故事

1996年，李嘉誠大仔李澤鉅，被大賊張子強綁架嘅時候，話說誠哥立即打電話畀前警務處處長李君夏，點知佢第一句就話：「唔好報警！」，之後，佢問李嘉誠有幾多個仔，因要避免再有家人成為綁匪嘅目標。

曾接受英國軍情五處訓練嘅李君夏，後嚟在訪問中提到：「其實當事人都要負部分責任，因為警覺性低冇安全意識，家人不時一人出入，或者只有司機陪住，至令賊人有機可乘。」

李君夏1937年出生於廣東新會，早年升讀英皇書院，後轉學伊利沙伯中學。1957年加入警隊，69年升警司，78年升總警司，最後成為香港華人首位警務署長。

有前皇家香港警察咁話：「李君夏講嘢好斯文，但有種壓場感覺，會主動同夥記傾吓計。佢亞哥李君達當時都係警司，性格亦係好人一個，零架子。」

2006年，李君夏69歲嗰年，離任長和集團顧問，正式退休，醉心鑽研古董同玉器，不時喺荷李活道古董店舖出現。

但自從妻子2007年逝世後，李君夏嘅健康狀況開始轉差，晚年同細女兒同住碧瑤灣，2017年1月，李君夏喺寓所暈倒，經搶救後不治，終年79歲。

回顧李君夏嘅一生，佢喺香港人心目中係個大好人，無架子，作為「一哥」，香港市民非常信任佢。相比之下，今時今日嘅警民關係似乎已經一去不返，令人感到無限唏噓同懷念嗰個年代嘅美好香港。