皇后碼頭的故事

中環曾經的皇后碼頭，作為一度為英國皇室成員訪港及港督上任的重要地點，跟鄰近的愛丁堡廣場、大會堂，組成中環的文物建築群，是這座城市繁華面貌下的歷史象徵，亦記錄了香港五、六十年代的發展、見證這個城市從「貴族與平民」逐步轉變為「現代政府與市民」的歷程。

可惜的是，因填海工程和政治因素，皇后碼頭在2007年結束運作，翌年更被拆除。然而，其影響力並未因此消失，在無數的昔日香港電視劇、電影和音樂錄影帶中，都可以見到皇后碼頭的影子，並且成記錄香港變遷的視覺記憶。

皇后碼頭嘅前身係皇后像停泊處（Queen's Statue Wharf），大約喺20世紀初落成。停泊處因為喺皇后像廣場之前，所以叫做「皇后」，指嘅係維多利亞女王，佢係英國女王同埋印度女皇。當時華人仲未有「女王」嘅概念，所以就譯做「皇后」。

1921年，海港工程處決定要重建碼頭，喺 1924 年 7 月 31 日經過香港立法局通過改名為皇后碼頭，碼頭喺 1925 年 10 月落成，位置喺皇后像廣場同埋皇后行（香港文華東方酒店依家嘅位置）附近。上面嘅結構採用鋼鐵同混凝土柱，斥資 20 萬港元興建，碼頭當年會掛住英國國旗。

去到 1953 年 4 月， 皇后同埋天星碼頭先後搬至後來大家熟悉嘅位置，之後歷任港督抵達中環、喺皇后碼頭上岸，然後步入大會堂宣誓就職。呢次嘅搬遷，標誌住殖民政府同人民嘅關係由以往嘅「貴族同平民」，轉為「現代政府同市民」，皇后碼頭更與鄰近嘅大會堂、愛丁堡廣場同埋天星碼頭組成一個建築群，係一個具有歷史象徵嘅整體。

皇后碼頭嘅建築風格係現代實用主義，多年嚟只喺材料方面有一啲輕微嘅改動，碼頭嘅建築風格同裝飾嘅特點維持不變。皇后碼頭同大會堂嘅綜合建築反映咗五、六十年代嘅典型現代主義建築風格。

時至2000年，皇后碼頭因為需要配合中環填海計劃，所以決定於2006年11月，新中環碼頭啟用後，新皇后碼頭與天星碼頭一同拆卸。

在當年，由一班建築師、規劃師等專業人士組成的「保育皇后碼頭古蹟專業關注組」表示，中環填海後，只要把地下去水管、P2路和機鐵掉頭隧道輕微改道，便可在皇后碼頭現址對開興建一個「人工湖」，屆時毋須清拆皇后碼頭，更可重置舊天星鐘樓。

創建香港創會會員司馬文亦指出，根據政府文件，皇后碼頭原址重置只需約 3000 萬元，但政府決定將碼頭遷中環 9 號與 10 號碼頭間，花費高達 2.2 億元。

多個團體會 2006 年 12 月 24 日平安夜晚上 8 時在愛丁堡廣場發起「盼望天星的聖誕」燭光集會，要求香港政府復修愛丁堡廣場碼頭，並且爭取保留皇后碼頭。

保育人士朱凱廸稱，保衛皇后碼頭並非留戀昔日殖民時代嘅日子，係要讓下一代透過城市格局了解本港嘅過去。佢批評政府沿用昔日官僚主導嘅管治形式，剝奪市民保留文化歷史嘅自主權。

周潤發更喺 2007 年 4 月 28 日清晨到達皇后碼頭簽名支持保留碼頭。去到 2007 年 8 月 1 日，仍然有十幾名爭取保留皇后碼頭嘅人士喺該處靜坐及露宿，並且喺該碼頭舉行圖片展覽及簽名活動。

直至動工遷拆皇后碼頭嘅死線逼近，三名年紀只係 20 多歲嘅本土行動成員昨日開始無限期絕食，直到政府答應取消動工，保留原址嘅皇后碼頭為止。佢哋強調會用和平手段死守皇后碼頭。

2007 年 7 月 31 號，香港高等法院接納本土行動成員何來同朱凱迪嘅司法覆核申請，阻止政府清拆皇后碼頭。法官林文瀚指出申請當中兩個理據有法律爭議性，所以接納咗覆核申請，並排期至 2007 年 8 月 7 號開審。

然而，香港政府隨即表示會繼續清場行動，收回土地俾承建商；最終喺早上 11 點先開始地上清場，然後喺傍晚 6 點半開始對天台上嘅人進行清場，直到晚上 8 點 45 分。

時任發展局局長林鄭月娥喺 2007 年同保育人士公開對話嗰陣，代表特區政府講明會考慮重建皇后碼頭同原天星碼頭鐘樓，當年新聞報導咁樣形容：

「林鄭指出拆卸工程是合法和合乎程序，並重申拆卸後的皇后碼頭會重組，也認為皇后碼頭事件能夠開拓討論發展和保育的平台是一件好事。」

但到了 2023 年，政府依然未有履行重建皇后碼頭嘅承諾，而係話仲喺「詳細研究，未有具體時間表」嘅狀態，碼頭嘅組件依然存放係大嶼山嘅政府爆炸品倉庫入面。

而最耐人尋味嘅係，政府計劃喺 2023 年 9 月收返粉嶺高爾夫球場 32 公頃嘅土地，其中約有 9 公頃會興建 1.2 萬伙公營房屋。香港高爾夫球會就入稟高院提出司法覆核，佢哋嘅代表係資深大律師余若海，竟然指出舊球場有超過百年嘅歷史，可以視為「文物」，同皇后碼頭嘅歷史價值並無差別。

睇返報導，嶺南大學香港與華南歷史研究部嘅主任、曾經係古物諮詢委員會同城市規劃委員會嘅成員嘅劉智鵬，就曾經認為 2007 年拆咗嘅皇后碼頭「冇乜重要歷史價值」。但佢喺 2014 年前接受粉嶺高爾夫球場嘅委託，就球場嘅歷史進行研究，竟然話拆咗高球場係「走保育回頭路」。

除咗周潤發以外，曾經喺皇后碼頭拍過電影《最佳拍檔》嘅許冠傑，當年亦趁碼頭清拆之前，再到皇后碼頭拍攝咗歌曲《鐘聲響起》嘅MV，作為留低一個紀念。

皇后碼頭帶給香港無數嘅歷史回憶，佢見證咗英國皇室成員嘅訪問，同埋歷任港督嘅執政嘅開始，香港人悼念皇后碼頭唔單止係一個物理空間嘅消失，更係一段歷史記憶嘅消逝。皇后碼頭的消失，似乎早已揭示了一種時代的終結。