倪匡偷渡落香港前的故事

【歷史上的今天】倪匡喺1935年5月30日喺上海出世，原名叫做倪聰，字亦明。

倪匡喺散文集《何必認真》寫過，自己細個嘅時候好鍾意跟大人去上海嘅「小菜場」，可以見到好多平時見唔到嘅嘢同埋人生百態。倪匡細個嘅時候，最大嘅願望就係成功慫勇大人買佢想食嘅嘢，例如拷子魚。細個嘅倪匡鍾意睇書，就養成咗佢讀雜書嘅習慣。

1951年，16歲嘅倪匡為咗追求烏托邦嘅理想，輟學離家出走，自己一個人由上海去咗蘇州，喺華東人民革命大學第四部受訓三個月。1955年嘅時候，佢主動申請去內蒙古開辦勞改農場種植水稻。

參與咗革命幾年，倪匡開始覺得有啲嘢唔對路，現實同宣傳上嘅平等世界完全唔一樣：例如喺軍隊裡面就有好多特權，無論大小事都要報告思想、開會檢討，對於鍾意自由嘅倪匡嚟講，佢覺得好唔滿意同失望，經常同上級爭執。

1955年嘅冬天，倪匡偷養嘅狼狗咬傷咗大隊長，另外，因為風雪封路，冇嘢燃燒，佢同同伴拆咗一條木橋嚟生火取暖，結果被勞改大隊書記指嘅罪名係「破壞交通」，佢就被視作反革命，兩罪合一，倪匡被關喺木屋裡面等待工作小組審查。

直到5月中旬，有個蒙古朋友幫佢，佢就連夜騎馬逃去泰來縣火車站。「當我喺內蒙古出逃時候，本來想向騎馬向北走，但五月份落咗一場大雪，我見唔到北斗星，於是就改向東，見到火車，我都唔理得佢去邊，就錦直接上咗火車。」

由於喺上海投靠兄長失敗，於是繼續向南邊逃。「當時候上海嘅公園有人擺檔，話去香港要幾多錢，如果搭大輪船去，要四百五十蚊，偷渡落去要一百五十蚊。我父母話最多可以負擔一百五十蚊，錦我咪偷渡落嚟囉。」

回憶當年，倪匡要多次食老鼠、螞蟻、棉桃度日，走咗三個月路至到廣州。之後佢自刻印章，呃過關防人員，逃出咗大陸，再喺1957年7月，經澳門成功偷渡到香港。

今日嘅香港人非常懷念倪匡，其實所懷念嘅，亦係過去講咩都冇禁忌、百無禁忌嘅香港。