修哥胡楓的開心哲學

胡楓，本名係胡繼修，所以大家叫佢「修哥」，英文名叫Bowie。1932年1月18日喺廣州出世，童年係西關生活，長大於香港。

1953年，修哥 21歲嗰陣投考大成電影公司。當年有過千人試鏡，雖然佢口吃好嚴重，但係都諗唔到第二日就收到錄取通知。原來修哥面對鏡頭嗰陣可以完全克服口吃問題。佢第一部電影就有機會做男主角，同花旦王芳艷芬拍《男人心》。1960年代後期，修哥同蕭芳芳合作過唔少歌舞片，舞藝精湛，所以有「舞王修」之稱。

胡楓至今喺影視圈嘅地位非常崇高，人緣都好好。90歲嗰陣，無綫電視為佢舉行咗《人生90好楓Show》，好多影視明星同名人都黎撐場。修哥曾經咁話：「喺名利圈你乜都唔爭，點夠人鬥，我話有麝自然香，唔使同人爭」。

修哥攞咗第 41 屆金像獎嘅「終身成熟獎」，佢覺得等咗好多年，但佢亦表示唔會停步，會繼續做啲有趣嘅工作。點解呢？修哥接受訪問話過：「好多朋友退休嘅時候，覺得應該享受人生，但係退休之後身體開始變差。所以佢唔會退休，而係會繼續做有趣嘅工作，交多啲新朋友，同朋友保持聯絡。咁樣生活就會更加開心同有趣。」

身邊嘅老友一個又一個走咗，修哥其實心裡面都會諗，自己什麼時候會輪到？但佢同自己講，順其自然，唔使諗太多令自己傷心：「當我諗起呢啲唔開心嘅事，我就會覺得對唔住自己，所以我會盡量令自己開心。就算遇到啲唔開心嘅事，例如以前撞傷腳，我都會開心面對。如果成日愁眉苦臉，日子咪只會更加難過。你見到我每日都好開心，唔係話冇唔開心嘅事，而係我努力令自己開心，因為我唔想辜負自己嘅人生吖嘛！」

#HKSTORY #演員 #胡楓