李兆基的故事

2019年6月2日，李兆基逝世，享年69歲。作為「香港影壇四大惡人」之一，佢嘅一生本身就係一個精彩絕倫嘅劇本。

李兆基喺戰後嬰兒潮出世，70年代初，年輕嘅佢初入社會，窮苦令佢成為「童黨」，食煙、打交、搶劫咩都做過。

血氣方剛嘅佢，後來甚至混出咗「慈雲山十三太保」嘅名堂，當年喺香港著名嘅14K「大佬」陳慎芝帶領下，一度無法無天為所欲為。

李兆基憶起當年：「當時嘅我真係一件垃圾，屋企人唔認我係仔，兄弟姊妹都唔會理我，令我最內疚嘅係，連阿爸嘅葬禮都冇畀我參加。」

去到80年代，十三太保個個都開始改邪歸正，大哥陳慎芝亦致力於戒毒嘅社會工作，後來更喺1987年獲選為香港十大傑出青年。

曾經係童黨嘅李兆基，之後入咗電視台做資料搜集同物色外景嘅工作。本來因為佢坐過監、掂過毒品，主流社會唔容易接納佢。

但係，隨住《古惑仔》系列電影嘅崛起，佢唔單止喺戲裡面飾演黑社會大佬，仲成為電影嘅顧問，巧合之下入咗演藝圈。

後來嘅「香港影壇四大惡人」之一，包括何家駒、成奎安、黃光亮同佢，雖然係配角演員，但係出鏡率好高，經常出現喺好多熱門電影裡面。

譬如李兆基喺《古惑仔》裡面飾演嘅「吹水基」、喺「星爺」嘅作品《行運一條龍》、《算死草》、《喜劇之王》、《食神》亦有佢精彩嘅演出。

值得一提嘅係，2017年嘅電影《毒・誡》講述嘅，正係陳慎芝同李兆基呢段「慈雲山十三太保」嘅真人真事。

隨住年紀漸大，李兆基無法好似以前咁，出演一啲打鬥場面，逐漸退出公眾嘅視線。佢之後雖然投資咗幾部電影，但係香港影壇嘅衰退，都令佢嘅投資得唔到好嘅回報。

晚年嘅李兆基依靠手頭上嘅積蓄同摯友救濟度日，生活窘迫，但係佢接受訪問時表明，其實清閒嘅日子都好愜意。

2015年，65歲嘅李兆基不幸中風，醫好之後嘅3年又再中。2018年，李兆基查出患上肝癌，早已經破產嘅佢，仲邊有錢去醫病？

當時佢咁話：「唉，我都六七十歲喇，仲要我做手術，病就病囉，冇辦法，走之前，揮揮手講聲拜拜，唔使為我覺得可惜，我已經好滿足喇，69歲先患肝癌，唔係已經好好喇咩。」

雖然李兆基打算放棄治療，但係呢件事，引起咗古天樂嘅注意，佢主動聯絡李兆基，邊勸佢接受治療，邊為佢籌措手術費。

後來，李兆基病情穩定後，一生未婚、無兒無女嘅佢，同一齊幾十年嘅女友，舉行咗一場簡單嘅婚禮，算係達成一個心願，亦因為佢哋結咗婚，就可以將公屋留俾太太。

2019年6月2日，69歲嘅李兆基，由於肝癌擴散到肺部與世長辭。記得喺一次嘅訪問裡面，佢笑著咁話，其實一直覺得生死無咩所謂，有時太長命反而更辛苦，仲叮囑年輕人唔好吸毒：「好似我啲兄弟咁，後生就患咗癌症、肺炎，呢啲後遺症要等二三十年後至發出嚟，所以真係千祈唔好吸毒！」

由「慈雲山十三太保」到「香港影壇四大惡人」，李兆基璀燦嘅一生雖然大起大落，但佢證明咗過去嘅錯誤，唔絕對定義我哋嘅未來，只要願意改變、從錯誤中學習，人人都可以好似佢咁活出一個精彩嘅人生。