蘇杏璇的故事

1952年出世喺香港嘅蘇杏璇，係已故著名演員黃曼梨嘅養女。佢細個嗰陣喺香港島西灣河大石街住，喺筲箕灣官立小學同埋筲箕灣崇真學校讀書。

讀中學嗰陣，蘇杏璇就熱愛演戲，只要角色可以發揮，無論戲份多少、就算演人哋呀媽，佢都唔會介意。

1972年20歲嘅時候，佢參加第一期嘅無綫電視藝員訓練班入行，同班同學包括呂有慧、程可為、許紹雄、甘國亮等人。

由於佢外表成熟，一入行就開始演「媽媽級」嘅角色，估唔到佢一演就係40年。

「我從來冇喺電視、電影裡面演過少女，但我絕對唔係天生老成。18歲嗰年我被電車撞到，可能有啲內傷，所以後來外貌就突然老咗幾年。」蘇杏璇咁講。

例如喺《秋瑾》裡面，蘇杏璇飾演汪明荃嘅媽媽，但其實汪明荃比蘇杏璇大5歲。

最經典係喺《義不容情》裡面，蘇杏璇飾演一個養育四個非親生子女嘅慈母，最後不幸被養子丁有康殺死。

1990年代中，蘇杏璇喺旺角通菜街開咗一間齋館，其間曾經喺亞洲電視拍咗兩三套劇集，屬於半息影狀態，好少接拍劇集。「我追求嘅係簡單平靜嘅生活。」

2011年，佢喺《奪命金》裡面飾演「鄭小娟」，蘇杏璇將角色嘅無知同埋貪心演繹得十分到位，片中嘅對白「清楚明白」更成為經典。佢更因呢個角色，榮獲第31屆香港電影金像獎最佳女配角。

但佢因病患未能出席頒獎禮，晚年長期被糖尿病困擾嘅蘇杏璇，最後因為中風後遺症，2013年6月12日喺伊利沙伯醫院離世，享年61歲，兒子話佢去世嗰陣好安詳。

一班曾經同蘇杏璇合作過嘅圈中朋友都深感難過，多次同佢飾演母子嘅梁朝偉更表示：「佢永遠活喺我心裡面。」

蘇杏璇係佛教徒，除咗佢嘅出色演技外，佢嘅善良和慈悲，亦為佢嘅一生畫上咗完美嘅句號。