林家聲的故事

粵劇名伶林家聲，一生都獻身於粵劇事業。佢建立咗好多個劇團，創作咗《雷鳴金鼓戰笳聲》、《無情保劍有情天》等粵劇作品，多年來積極推動粵劇嘅發展。 1981年，佢獲英女皇授予榮譽勳銜，不過喺1993年後就漸漸淡出咗舞台，晚年患上咗柏金遜症。

昔日香港曾經孕育咗好多粵劇名伶，俾唔同嘅表演藝術家展現自己嘅平台，呢班名伶無不工作認真、勤奮，好似林家聲咁磨練演藝技巧。

林家聲喺香港出生，爸爸係大埔火車站站長，媽媽喺林家聲3歲嗰陣因病過身，佢有一個胞姊。

喺1939年至1941年期間，林家聲讀崇德學校，因為香港當時係日本統治，日本政府規定所有香港學校都要教日文，佢唔想學，所以就退學、轉去彌敦道嗰個玫瑰音樂學院，跟容得怡同容德昌學唱粵曲同彈洋琴。

1943年，林家聲拜鄧肖蘭芳為師，開始學習粵劇排場戲。佢以古老的排場戲「中州音」古腔來唱歌，而當時佢只有11歲，並以神童的姿態演出了佢的第一個角色「武松」。在粵劇演出中，佢係從小角色開始。

香港重光後，林家聲由廣州回到了香港（戰時舉家北上避難），得到了幾位名師的傳授，佢還曾跟隨袁小田學藝。 1948年，佢成為了粵劇四大天王之一薛覺先的最後一位入室弟子。

時間快轉去到60年代中期，正值文化大革命，香港社會亦一片混亂，暴動、宵禁無日無之，市民都祗願留喺屋企睇免費電視。而且暴動平復之後，國語電影同時代曲開始興起，客觀情況對粵劇發展相當不利。

但係喺1962年，林家聲依然組成咗「慶新聲劇團」，仲擔任文武生一職，同編劇徐子郎同潘焯合作。 1965年，佢再次成立一個完全可以實驗自己理想嘅劇團「頌新聲劇團」，同編劇李少芸同葉紹德合作。

「頌新聲劇團」創立喺香港嘅「火紅年代」，學運、工潮、暴動，社會動盪不安，林家聲設定咗長期嘅演出計劃，希望喺呢個荒蕪咗嘅香港粵劇界，重新喚起人哋嘅注意同埋重視，為粵劇嘅存亡努力。

當觀眾慶幸頌新聲可以為粵劇帶嚟清風嘅時候，六七年春節之後，演完咗第四屆嘅《龍鳳爭掛師》之後，就因為劇本難求同埋院期零碎嘅原因，就無奈宣告解散。

但於短短一年，已經創作咗四套全新劇本，頌新聲嘅努力同成績，係有目共睹，呢個初試啼聲嘅演出，被視為頌新聲嘅探索期。佢哋嘅嚴謹認真嘅演出風格，已經為低沉灰暗嘅粵劇點亮咗明燈，指引出一條可行同埋值得一試嘅路。

至於在電影界，林家聲亦獲獎無數，佢每年拍嘅電影都能夠入選「香港十大賣座電影」，但係喺一九六六年，佢嘅最後一套電影《孝女珠珠》 ── 一套講述伶人奮鬥成功嘅電影殺科之後，佢就咁結束咗自己嘅銀色生涯，繼續投身自己最鍾愛的粵劇。

喺粵語片製作量仍然高企之際，邊個會毅然決然咁離開呢個能夠賺大錢同有名利嘅銀色行業、全身投入到接近被淘汰、收入同付出唔成比例嘅粵劇藝術？林家聲當時嘅選擇，相信係絕無僅有。

林家聲對粵劇嘅執著同追求真係令人敬佩。喺佢眼中，金錢嘅多寡唔係最重要嘅，佢追求嘅係可以發揮自己所長嘅舞台，佢曾接受訪問時提到：「錢嘛，亦唔知點算多點算少。我只係覺得，電影唔能夠發揮我所長，而舞台，我可以參與、發表意見，決定點樣處理自己嘅戲，所以我最後決定返到舞台全身投入。」

2015年8月4號晚上9點52分，林家聲喺九龍塘窩打老道寓所心跳突然變弱暈倒，昏迷後由佢嘅弟子周振基送去廣華醫院救治，可惜至晚上11點左右證實不治，享壽82歲。