點解要說好香港故事？

大家好，我是一個前傳媒工作者。同大家一樣，我見證住曾經熟悉的傳媒機構一間間消失、或者變得面目全非 —— 不只是機構本身，而係佢哋曾代表嘅精神同價值觀。而香港嘅街道、建築物以至生活方式，亦喺度快速改變緊，唔少熟悉嘅人與地方都逐漸遠去，曾經熟悉嘅香港，亦開始變得愈嚟愈陌生。

有次我想翻查一啲曾經好重要嘅新聞，竟然發現佢哋已經喺網絡上消失，連記憶嘅載體都無法保存！呢一刻，我真正感受到，資訊同文化喺呢個時代中消失嘅速度，超過我哋所想像。

我哋想保留嘅，不止係資料或者片段嘅記憶，而係香港人核心嘅價值——專業、傳統同對未來嘅堅持。希望下一代可以理解呢啲價值，珍惜佢哋，並傳承落去。

不過，喺移居海外之後，我感受到一種孤立感。港人活動少之又少，大部分人只同家人或者一兩個朋友聯繫；留喺香港嘅人，亦因為社會環境選擇低調生活。文化嘅連結，似乎一步步被削弱。

面對資訊封鎖、媒體自我審查，以至法律同國家體制，文化記憶嘅保存變得異常困難。呢種無力感，成為我開設呢個 Substack 嘅最大驅動力。

用故事串連記憶

然後我發現，僅僅依靠自己用文字去記錄並唔足夠⋯⋯ 重要應用一啲簡單易明嘅故事形式，吸引更多人閱讀同收聽，甚至我哋希望有朝一日，連小朋友都會對呢啲昔日香港故事感興趣。

所以我哋專注於記錄同分享逐漸消失嘅香港故事，並用簡單方式讓每個人可以掌握同轉述，或者大家亦可以加入自己嘅故事，一齊去傳承呢啲香港嘅文化記憶。

消失的香港系列與聲音故事

經過近兩年努力，我哋推出咗「消失的香港」系列，記錄咗許多已消失嘅地方同故事，重新連結香港嘅過去，並吸引到唔少訂戶支持。呢個系列一開始只係文字故事，而家已經發展變成聲音版嘅 Podcast 節目，令訂戶隨時隨地可以收聽。

呢兩年嘅工作令我明白，只要勇於行動，無論係步伐幾細都可以累積到一啲成果，但相信呢個旅程只係剛剛起步，仲有好多目標需要實現，未來仍需要大家嘅支持。

支持 HKSTORY，為下一代說好香港故事

最後，都希望做到昔日林振強曾經為《壹週刊》定下過嘅宗旨：「不扮高深，只求傳真」，可以喺度一直繼續為大家說好香港嘅故事。

歡迎大家馬上訂閱，收聽聲音故事、獲取足本內容，永不錯過每一篇更新之餘，亦可以支持我哋有足夠資源創作更深度內容、確保製作呢啲故事嘅可持續性。

傳承香港文化同精神，由《說好香港故事囉 😎 》開始！