山頂老襯亭的故事

老襯亭，原名鮑寧亭，係香港島扯旗山同歌賦山之間嘅爐峰峽上，一個已經唔係度嘅建築物。有唔少遊客甚至香港人本身，都會誤會咗老襯亭係凌霄閣側邊，由獅子會捐款興建嘅中式觀景亭獅子亭。其實佢係凌霄閣嘅前身，亦曾經係山頂纜車嘅終點站。

「老襯」喺廣東話入面指蠢人。有人話，爬上山頂只為睇風景係傻瓜行為，所以稱為「老襯」；另一種說法係源於當時俗語，話「香港地老襯死唔曬」，所以喺亭入面俯瞰太平山下，可以見到唔少老襯咁話。

第一代老襯亭於20世紀初已經建好，只係一個觀景亭，原名叫鮑寧亭，佢喺香港日治時期被毀。

到咗1950年代由香港大酒店建成嘅建築物，當時作為山頂纜車嘅山頂站，仍被俗稱為老襯亭，算係第二代建築，佢1955年開放，並於1969年拆卸。

（由於解像度問題，部分照片經 AI 修復）

去到1972年，建築物又重建成為上一代嘅「爐峰塔」，佢頂層設有西餐廳，餐廳下層喺咖啡室，而最底層係中菜餐廳。根據建築師鍾華楠先生嘅講法，爐峰塔嘅外型係仿照古城門同城樓，因為同樣可以監察海陸空交通。

嚟到1992年，香港上海大酒店重建爐峰塔，原址發展成而家嘅凌霄閣，可以話係第四代嘅老襯亭。

凌霄閣嘅建築師係英國人Terry Farrell，設計呈半圓形同中空設計，底下仲有一個正方形，簡潔得嚟唔失精緻，令人感受到強烈嘅現代同未來感，就好似一個漂浮喺天際嘅太空船。

老襯亭雖然已經唔喺度，留底僅餘嘅名字同記憶。但佢嘅歷史同文化價值好重要，亦係香港歷史當中一道美麗嘅風景線。