喺1963年10月10日，梅豔芳出世喺旺角花園街，佢啲哥哥同姐姐都係出世喺大陸。梅家有四個細路，大哥梅啟明，二哥梅德明，大姐梅愛芳，同埋梅豔芳自己，佢係唯一出世喺香港嘅細路。
由於爸爸早過身，媽咪覃美金嚟自廣州西關，係一名中醫，曾喺亞皆老街經營「月華中醫診所」，覃美金之後又創辦「錦霞歌舞劇團」同埋「華強中西音樂學校」。
梅豔芳四歲半已經同大姐梅愛芳被媽咪送去荔園演唱，兩姊妹一開始嘅藝名係「芳芳」同「寶珠」，因為梅愛芳鍾意蕭芳芳，梅豔芳鍾意陳寶珠；之後藝名分別係「依娜」同「依華」。
梅豔芳小學就讀九龍婦女福利會李炳紀念學校，讀到小四就轉學。嗰陣時香港嘅賣唱職業好受人鄙視，所以受到同學哋冷眼同笑話，笑佢係個冇出息嘅「歌女」，最後只好讀書到中一就辭學。
梅豔芳雖然冇正式拜師學藝，但細個四圍登台，打下紮實嘅演藝底子，加上好強舞台天份，啱啱讀小學已經識唱幾百首歌。特式係個子細，但聲音大，連後排嘅人都清楚聽到佢嘅歌聲。年紀細細就喺舞台之間奔波，有好豐富舞台經驗。
後嚟，梅豔芳用「依華」呢個藝名，參加第一屆新秀歌唱大賽，簽約華星之後至改用真名。係一次訪問當中，佢分享當年同姐姐一齊參賽嘅心情：「當年十七歲參加新秀嘅我，已經喺酒狼同夜總會有啲名氣，周圍好多人鼓勵我參加新秀，我都拒絕咗，但阿 Ann 幫我交咗報名表格，我哋兩個都入選咗，佢喺半準決賽就被淘汰，將所有希望都寄托喺我身上，去到總決賽嗰晚，知我得咗冠軍，阿 Ann 同媽咪激動到抱埋喺一齊喊。仲記得我第一次開個人演唱會，我請咗大姐做特別嘉賓，我想同佢分享我嘅成功同喜悅。」
梅豔芳童年好少家庭溫暖，姐妹兩人演出成日受到冷眼，常常要承受寒冷天氣同挨餓。佢好坦白咁話，如果時光可以倒流，希望可以多讀書，唔使細細個就擔心挨餓。
有次梅豔芳接受明周訪問時透露：「細個嗰陣時，媽媽嘅性格比較剛烈，脾氣又大，而我自細個性反叛，每次做錯嘢，媽咪都會罰我同大姐，最慘係我唔肯認錯，而大姐怕事，所以，自細我同Ann嘅身份好似對調咗。每次有事發生，都係由我保護大姐。最記得我哋十幾歲嘅時候，臨瞓之前，一定要將一枝木棍放喺枕頭邊，因為當時擔心後父會嚟騷擾我哋。你知啦，Ann 嘅個性比較細膽，例如我哋喺外地登台，大家住喺一間房，一定要開燈瞓覺，就係因為Ann怕黑。兩個人如果其中一個去廁所，另一個一定要企喺廁所門口陪住對方。」
梅艷芳雖然經歷過艱苦嘅童年，但喺供養母親方面卻不計前嫌。雖然佢都曾經決定，話以後唔再喺公開場合度提阿媽：「我唔喺公開場合提起佢，係唔想將家事掛喺嘴邊。當然，我唔係對佢做嘅每一件事都認同，但係我唔會去批評，因為我冇呢種資格。講到底，佢都係我媽媽，呢層關係永遠都唔會變。」
梅艷芳即使離開咗咁多年，但佢嘅影響力依然係度。梅艷芳係香港演藝界第一位同時取得「歌后」同「影后」級榮譽嘅女藝人，唔單止留低咗演藝作品，亦係華語樂壇和電影界的傳奇人物，佢嘅傳奇同才華將會跨越時間，永遠地咁刻喺香港演藝圈同全世界支持者嘅心入面。
【聲音版】梅豔芳童年的故事（試聽）